اوعى تصدق :
ا- أوعى تصدق ان المصريين بيقتلوا بعض عشان الكوره
2- أوعى تصدق اننا محتاجين قانون طوارئ
3- اوعى تصدق ان الجيش حمى الثوره
4- أوعى تصدق ان أمن الدوله معدش موجود
... 5- أوعى تصدق ان الشرطه مش متواطئه
6- اوعى تصدق ان الجنزورى هيجيب حق الشهدا
7 - أوعى تصدق خطاب القوات المسلحه اللى هينزل كمان شويه ويقولو ايادى خفيه بتعبث بأمن الوطن
8- اوعى تصدق ان اللى نزلوا الاستاد وقتلوا اخواتنا دول يهمهم كوره ولا بلد او دول بورسعيديه اساسا
انتشرت على كل مواقع التواصل بعد اللى حصل فى ذكرى موقعه الجمل بخلاف صوره الطفل المتلطخ بالدم وكل الكومنتات تحتها اتقو الله دى طفل من الثوره السوريه
لا ياعم اليمنيه
انا بقى بقولك دى من كولا لامبور وحياتك مافرقه وطبيعى يحصل كده وطبيعى الكومنتات دى محنا متعودين ننقد بعض بس لكن نفهم بعض لا يعنى هى جت على الصوره مجهوله المصدر طيب مهو فى اكتر من 70 شاب زى الورد راحوا بس لانه مشجع كوره!! لا طب يمكن عشان اهلاوى وبيتفرجع فى بورسعيد معقل النادى المصرى برضو لا ايه الجديد مهما على طول بيشجعو فى اى حته امال ايه!!
اصلهم لازم يتربو نزلو فى جمعه تسليم السلطه واعلنو عن نفسهم احنا ألتراس اهلاوى بننضم للمسيرات والمظاهرات يبقى هتتروق
وتحس انه من الغباء ان يتكرر نفس اللى حصل بنفس الطريقه بنفس البلطجيه ...وتتوقع نتايج مختلفه
لو مش عايز تصدق ان المجلس العسكرى مسئول رغم انه ماكنش فى اى رد فعل لاستغاثه الجمهور
وانه حمى وبيحمى الثوره وانه مستحمل كتير مننا وكان ممكن يعمل فينا زى ما بيتعمل فى سوريا يبقى انت ذاكرتك ضعيفه ونسيت منظر الناس اللى كانو ميتين ومرمين فى الزباله وست البنات اللى اتعرت
لو شايف انها فوتوشوب او هى اللى استفزت الظابط وشتمته يبقى انت مشفتش الفيديو بتاعه وهو فى المقدمه وراه صف ظباط وعساكر بيستخدمو صوبعهم الوسطانى بلفظ بذى ورافع الجزمه كلهم فى وشها
انما بقى لو شايف انها بنت ودى نازله ليه اصلا يبقى انت مش شايف ان كل اللى فى البلد دول مصريين من حقهم يعبرو عن حبهم لبلدهم ويساعدو غيرهم مهما كان نوع الصرى دى فى البطاقه ذكر ولا انثى
لو مش مصدق انه مسئول عن حرق المجمع العلمى والبلطجيه اللى كانو فوق يبقى انت مش عارف ان المطافى مش بعيده عن المجمع اللى سابوه يولع اكتر من 10 ساعات رغم ان المطافى لو رفعت الخرطوم من عندها هتطفى الحريقه
لو مش مصدق ان الشرطه متواطئه فى كل حاجه يبقى انت نسيت اننا كنا بناخد على قفانا منهم 30 سنه وبيتقالهم يابااشا ويا بيه وانت ببساطه كده فى اسمه 25 \1\2011 جيت ونزلت بس الشارع وانضربت وانت اللى انتصرت عليهم فى الاخر
لو مش عايز تصدق ان البنك اللى اتسرق والبلطجيه والانفلات الامنى اللى ظهر بعد خطاب المشير وخصوصا بعد كلمه ايفقاف العمل بقانون الطوارىء الا لو ظهرت حالات من البلطجه بقولك البلطجه اهى ظهرت ومفيش الغاء لقانون الطوارى اللى هو متلغاش اصلا
لو مش عايز تصدق ان امن الدوله متلغاش وانهم غيرو اسمه من امن الدوله للامن الوطنى اقولك انهم حتى لو سموه بهانه نفس الناس اللى فيه متغيروش وطبيعى نفس الاسلوب اللى بتعاملو بيه متغيرش
لو مش عايز تصدق كل ده انت حر ..لكن ماتقتعنيش انى مصدقش زيك
واقعد جنبك ونغنى سوا عايزين استقرار
لكل اللى قالو نعم فى الاستفتاء عشان الاستقرار ..
لكل اللى خايفين المجلس يمشى عشان الاستقرار ..
لكل اللى بينزلو العباسيه عشان الاستقرار ..
لكل اللى بيقولو نستنى لشهر 6 عشان الاستقرار ..
حلو الاستقرار ده ولا عايز تستقر اكتر ?
