ولو انت شربت مخدرات قبل كده يبئى كلامى ده مش هيبئى غريب عليك
ولو شفت حد بيشرب مخدرات قبل كده يبئى اكيد هتأكد الكلام اللى هقوله
لكن لو انت ماشربت او ماتعرفش يبئى تركز معايا فى اللى هقوله
نبدأ من الدماغ العالية ... الحشيش..
الحشيش مادة طرية شوية ولونها بنى مش غامق اوى...
فى ناس بتقول ان الحشيش مش بيسطل
دول نقول لهم عدم المؤاخذة الحشيش مخدر... والمخدر بيسطل.
وكل اللى بيشربوا حشيش بيتسطلوا.
بس هما بيحبوا يقولوا انهم مش مساطيل
وان الحشيش ده دماغ نضيفة
بس الحشيش بيعمل حاجات غريبة فى البنى ادم
اهمها النسيان
اى حد وهو بيشرب حشيش دماغة بتفصل
يعنى ممكن يكون بيتكلم فى موضوع وفجأة تلائيه سكت
عارفين سكت ليه؟؟
علشان نسى هو بيتكلم فى ايه
تخيل معايا كده
انت قاعد بتتكلم مع حد فى موضوع مهم
وفجأة نسيت الموضوع اللى انت بتتكلم فيه
ايه رأيك؟ حسيت بايه؟
ده غير انه اصلاً مش عارف يركز فى الكلام
المحششين الخبرة بئى تلائى كلامهم قليل. ولو اتكلم يتكلم فى الهجايص
يعنى اى حاجة مش محتاجة تركيز او محتاجة كلام كتير
لأنه لو اتكلم كتير هيبئى المسخرة بتاعة القعدة
فكل واحد بيحاول يلم نفسه ويطلع من القعدة دى من غير ماحد يضحك عليه
خصوصاً لو فى حد فايق فى القعدة ومابيشربش
تانى حاجة الحشيش بيعملها فى البنى ادم
هى فقدان الإدراك او عدم الإدراك
المحشش بيبئى مش مدرك كل اللى حواليه
تفاصيل كتير فى الصورة اللى حوالية هو مش شايفها
بيبئى عامل زى اللى قدامه رز ولحمة وملوخية وورق عنب ومش شايف غير كباية المية اللى على جنب
وممكن يسأل انتوا مش هتجيبوا الأكل بئى ولا ايه!
واحد صاحبى اول مرة يشرب فيها حشيش – وكانت اخر مرة – نزل البحر وقعد يلف حوالين نفسه
يا عينى كان عايز يطلع من البحر بس مش عارف يطلع من اين.
مش مدرك انه علشان يطلع لازم يطلع من الشط..
واكيد عنيه وقعت على الشط بس هو مش مدرك ان ده الشط..
تخيل نفسك كده واقف قدام باب الشقة والباب مفتوح
وانت قاعد تفكر ادخل الشقة دى من اين وازاى.
ولا التانى اللى بيقول لمراته اعملى لنا حاجة ناكلها
قالت له مافيش أكل فى البيت
قالها امال الشاى والسكر اللى انا جايبهم لك دول ايه
مش مواد غذائية دى!!!
دى مش نكته..... ده موقف حقيقي.
هو ده عدم الإدراك اللى بيسببه الحشيش
اللى الناس بتقول عليه مابيسطلش!!!
ده غير ان الحشيش بيصيب شاربه بحالة من الهدوووووء
بتوصل فى بعض الأحيان الى الرغبة الشديدة النوم
وساعات بتبئى حالة رومانسية عالية
يعنى اللى عايزة جوزها يسمعها كلام حنين
تشربه حشيش!... بس ماتتوقعش انه هيعيش معاها كتير بعد كده.
كنت شغال فى مكان والمدير بتاعنا كان شريب حشيش
اليوم اللى كان بيجى فيه عامل اصطباحه
كان بيبئى يوم زى العسل
كان بيبئى زى النسمة وابتسامه طول اليوم
واللى عايز اى حاجة هو معندوش مانع
وتحس انه زى اخوك الكبير
وايه كمية الحب دى كلها
لكن
اليوم اللى بيجى فيه فايق
بيبئى يوم ازرق
بيخنق على كل البنى ادمين اللى حواليه.. وبيضرب خمسين اسفين فى اليوم ده.
المهم
الحشيش بيتشرب بأكتر من طريقة
ممكن تلفه فى سيجارة... المفترض ان القرش يعمل تلات اربع سجاير..
بس فى ناس بتحط القرش الواحد فى سيجارة واحدة.
ولمعلوماتك القرش 40 جرام
والوقية قرشين ونص
والفرش 10 وقيات... يعنى كيلو بالتمام.
ومن فترة قريبة كان الفرش بالكامل ممكن تشتريه ب 3000 جنيه
وتبيعه فرط ب 10000 جنيه
يعنى مكسب 7000 جنيه فى الفرش
لو بعت لك فرش فى الأسبوع... ده لو انت واد خايب ومابتعرفش تبيع
هتكسب لك 28000 جنيه فى الشهر
ولو اتمسكت هتاخد 15 سنة سجن... او اعدام... على حسب الكمية اللى معاك.
ده غير اللى هيتعمل فيك فى الآخرة لما تموت وتقابل ربنا.
المهم
الحشيش ممكن يتشرب فى سيجارة عادية
وممكن تشربه فى كوباية... ازاى؟
هقولك ازاى
تقطع الحشيش اللى معاك عيدان طويلة
وتحط العود بين صباعك السبابة والوسطى تحت خالص
ويكون العود نازل لتحت
يعنى انت ماسك العود من طرفه
وتولع فى الطرف التانى
وتجيب كوباية طويلة وتحط العود فيها وانت لسه ماسكه
وتقفل على الكوباية كويس
هتلائى الدخان بدأ يملا الكوباية
اوعى الدخان يسرب منها
اقفل عليها كويس
لما الدخان يملى الكوباية وتبئى لونها ابيض خالص
افتح فتحة صغيرة
يعنى حرك الكوباية من تحت ايدك شوية بحيث ان بوز الكوباية يبئى باين
وحط بقك يا ريس واسحب جامد على قد ما تقدر
والله يرحمك يا نجم.
الحركة دى اسمها صاروخ حشيش
مش كل الناس تقدر عليها
لأن زى ما انتوا شايفين حشيش مركز وبدون اى اضافات
وفى ناس بدل ما تحط عود حشيش خالص بتحط سيجارة حشيش... تخفيضاً للنفقات.
فى بئى اللى اشد من دى
حاجة اسمها الغرقانة
بيجى اخونا المدمن ويجيب ازازة بلاستيك زى بتاعة المية المعدنية ويقطعها نصين
وياخد الجزء اللى فيه بوز الإزازة
ويجيب اى حاجة غويطة.. حلة صغيرة... طبق بلاستيك غويط...
ارتفاعه حوالى 10 او 15 سنتيمتر او اكتر...المهم مايقلش عن كده...ويملاه مية
ويجيب الأزازة اللى قاطعها ويحطها فى الطبق
بحيث يكون بوز الأزازة لفوق واخر حتة فى الإزازة هيا اللى فى المية
المهم يسيب جزء كبير من الإززة بره المية
ويجيب حاجة زى الصامولة كده وعليها سلك.
عارفين الشواية بتاعة الفراخ واللحمة
حاجة زيها كده بس على قد بوز الإزازة
ويحط على السلك ده حته حشيش
الكمية حسب المزاج
ويولع فيها
الدخان هيقعد يملا الإزازة
ولما كمية الدخان تبى مناسبة... يشيل الصامولة ويسحب الدخان.
واو
دى إنتحار رسمى.
انا شخصياً مش عارف ايه تأثير المية فى الموضوع
لكن انا شفتها كده
واتأكدت من أكتر من مصدر ان كل الحشاشين بيعملوها بنفس الطريقة
لكن هى مش غريبة.. عندك الشيشة مثلاُ فيها مية... عادى يعنى.
وفى ناس بتجيب قرش الحشيش وتحطه فى معلقة
وتسخن المعلقة على نار هادية
وتقعد تشم فى الدخان اللى طالع
يعنى... كل واحد ومزاجه
انا شخصياً شفت واحد مزاجه فى كل الطرق دى!
ومابيشربش سجاير عادية
تلائى فى جيبه علبه سجاير مارلبورو
كلها حشيش.
البانجو
البانجو بئى حاجة بيئة
يعنى الشباب التعبان
اللى بيشرب اى حاجة وخلاص
مع ان جت فترة كان البانجو هو مشروب الشباب الرئيسى
لكنه تراجع امام فخامة ومكانة الحشيش.
والبانجو للى ماشفهوش
عبارة عن نبات أخضر اللون يشبه الملوخية بعد ماتنشف.
وده بيتلف فى سجاير بس.
مالهوش طرق تانية فى الشرب.
المهم يتنقى كويس من البذور اللى فيه.
البانجو دماغة مش حلوة
يعنى اللى بيشرب بانجو ممكن تتخنق منه وماتحبش تقعد معاه
بعكس الحشيش
اللى بيشرب حشيش زى ماقلنا قبل كده بتجيلو حالة من الهدوء النفسى
وبيحب كل حاجة فى الدنيا
اما ضريب البانجو فدماغة بتبئى مش مضمونة.
ولو فتح فى الضحك مش هيبطل
واى حاجة ممكن تخليه يضحك
لو ابتسمت فى وشه بس هيقعد يضحك وكأنك قلت له نكته.
ولو طلبت معاه قرف وخنئه.
لو عملت له اللالى مش هيبتسم حتى.
مش قلنا دماغه مش مضمونة.
بيبئى فى دايماً مشكلة عند شريب البانجو
التجميع عنده بيتأخر اوى
يعنى ممكن يسمع نكتة وبعد النكتة ما تخلص بخمس دقائق يضحك
لو بتكلمه فى حاجة والكلام اللى انت بتقوله كتير
ممكن مايستوعبش حاجة خالص
لكن لو قلت كلام مختصر هيخاد وقت على مايستوعب... ده لو استوعب
ماشوفتوش انتوا اللى ضرب أنبوبة البوتجاز بالبوكس
الأنبوبة كسرت له ايده
البيه قايم يضرب الأنبوبة..
مايعرفش ان الأنبوبة معاها حزام اسود.
نيجى بئى للكارثة الحقيقية
البرشام والتركيبات
التركيبات دى عبارة عن اكتر من نوع دواء مخلوطين على بعض
دواء شرب على برشام مطحون
بس بنسب معينة وانواع معينة
وساعات فى ناس بتطحن اى برشام على اى حاجة وتسف.
التركيبة دى ممكن توقعك فى غيبوبة يومين تلاتة
يومين تلاتة انت نايم.. تصحى من النوم تنام تانى
ولو مانمتش اليومين كلهم... بعد ماتفوق هتلائى نفسك ناسى ايه اللى حصل فى اليومين دول.
اتمسحوا من الذاكرة... واترموا فى الـ "Recycle Bin" يا ريس.
الأدوية المشهورة فى التركيبات هى التوسيلار والتوسيفان والكوديفان
وياسلام بئى لو طحنت عليهم حبيتن تلاتة بركينول ولا امترل.... وحبيتين ليه!.. اطحن شريط بحاله.
ومش عايزين نلخبط بين الكودافين والكيتوفان
الكيتوفان ده مسكن عادى مالوش دعوة بالليلة دى.
المهم
غير التركيبات... فى البرشام لواحدة من غير اضافات
ومن اشهر انواع البرشام اللى بيضربها السادة المدمنين
البركينول وشهرته صراصير!
ابو صليبه... وده انا ناسى اسمه العلمى ايه.. مش مهم... كفاية اسم الشهرة
ترامادول
امترل
نوفاترين
والله اعلم ايه تانى.
كل واحد من دول له تأثيره الخاص وله دماغه
بس هما مشتركين فى حاجة واحدة
الدمار الشامل
العن انواع المخدرات هى البرشام بأنواعه
الكميا يعنى.
طبعاً بعد الهروين وعائلته.
لأن الكميا او البرشام بيحولوا البنى أدم لبنى قرد او بنى جذمة
خلاص مبيبئاش بنى ادم
البرشام بياكل دماغه بسرعة.. واللى بيتاكل منها مابيرجعش تانى.
يعنى اشهر حاجة بيعملها ضريبة البرشام
انهم بيقطعوا فى نفسهم!
تلائى الواحد منهم ماسك مطواه ولا اى ألة حادة
ونازل فى دراعه تشريح.
ماتفهمش ليه
ده غير التهيئات بئى يا ريس
اللى ضارب برشام ده بيبئى فى عالم سمسم
ممكن تكون انت قاعد وهو شايفك واقف او بتتحرك
او فى ناس تانية فى المكان
بعيد عنك المخ عنده بيخرف من كتر البرشام
وغالباً التهيئات بتبئى الحاجات اللى هو خايف منها
يعنى لو حد بيخاف من الكلاب مثلاً
ممكن يتهيئ له ان فى كلب قد الميكروباص واقف ادامه
واللى بيخاف من الحشرات ممكن يلائى الدنيا كلها بئت حشرات من الحجم الكبييييير.
يعنى... هو ودماغه والقرف اللى فيها.
ده غير النسيان والتوهان والضعف العام.
تخيل نفسك واقف مع واحد صاحبك وبتتكلم معاه
وفجأة... صاحبك ده بئى صرصار كبييير وله شنب طويييييييل
وبيلعب بشنبه على وشك.
حاجة تقرف يا جدع.
من اهم التأثيرات اللى بيسببها البرشام هى عدم الإحساس
يعنى البرشامجى ده ممكن تقعد تضرب فيه للصبح.. مش هيحس بحاجة
علشان كده دايماً اخوانا الصيع بيضربوا شريط برشام ولا حاجة قبل اى خناقة
علشان يستحمل الضرب اللى هياخده.
بس غالباً اخر حاجة هيضربها هى البرشام..
لأنه بعد كده مش هيبئى مركز فى اى حاجة..
ومش بعيد يضرب نفسه... او يضرب الناس اللى معاه.
ودى حصلت مع جماعة معرفة
ضربوا شريطين البرشام مع بعض
وطلعوا عالخناقة
وهناك... واثناء الطحن
واحد منهم ضرب التانى بماسورة حديد
التانى شاف كده ماستحملش
راح هاجم عليه
وبدل مايتخانقوا مع الناس التانين
قعدوا يضربوا فى بعض... هنقول ايه... مساطيل.
طبعاً الناس التانين ماكنوش واقفين بيتفرجوا.
بالنسبة للهروين
ماشفتش حد بيتعاطى هروين
ومش عايز افتى فى حاجة معرفهاش
هو انا قرأت عنه لكن القراءة مش زى ماتشوف بعينك
بس هو الأكيد انه ضريب الهروين مش هيعيش ليوم التلات.
الخلاصة
شوف يا بنى انت وهو
ربنا ادانا عقل علشان نستخدمه
حاول بئى تستخدمه وتفكر شوية فى كل اللى انا قلته ده
على فكرة
كل اللى فات ده انا شفته بنفسى محدش قالى عليه ولا قرأته فى كتب
غير موضوع الأنبوبة ده اتحكى لى ماشفتوش بنفسى.. بس اللى ضرب الأنبوبة انا عارفه.
انا ماكتبتش طبعاً كل اللى انا شفته من الأخوة المدمنين
انا كتبت شوية حاجات بسيطة توضح الصورة
فى بئى سؤال فضلت اسأله لكل المدمنين اللى عرفتهم
انت بتشرب مخدرات ليه؟
محدش رد عليا رد مقنع
محدش تقريباً عارف هو بيشب مخدرات ليه
بس هى اكتر رد سمعته كان "علشان نعرف نتعامل"
معرفش ايه اللى فى المخدرات يخلى الواحد يعرف يتعامل
الواحد وهو فايق بيبئى اكثر قدرة على التعامل مع اى حد
المخدر مالهوش تأثير على الشخصية مطلقاً
المخدر كل تأثيره عضوي
التأثير اللى بيحصل فى الشخصية مش نتيجة للمخدر
لكن نتيجة للرغبة فى المخدر
يعنى المخدر مش هيخليك شجاع ولا هيخليك فان دام
وغالباً المسطول بيعتمد على ان الناس غالباً بتخاف من المساطيل
يعنى انت لو شفت واحد مسطول مش هتكتر معاه فى الكلام
هتقول ده مسطول وتصرفاته مش مضمونة
هو عارف كده علشان كده بيخش بقلب جامد
ده غير انه فعلاً بيبئى مش مدرك معظم تصرفاته.
ده غير ان فى وجهة نظر غريبة لبعض المدمنين
وجهة النظر دى بتقول انهم مش مدمنين
وانهم ممكن بيطلوا فى اى وقت بس هما اللى مش عازين
طبعاً وجهة النظر دى ممكن تكونوا سمعتوها من اى حد قبل كده
مثلاً لو تعرف حد بيشرب سجاير
هيقولك الكلمة دى "انا لو عايز ابطل هبطل"
المهم بئى يا شباب
المدمن ده واحد اختار انه ينزل من مرتبة البنى أدمين الى مرتبة ادنى حتى من الحيوانات
ده واحد بيبوظ نفسه وبيبوظ عائلته وبيبوظ اى حاجة ليها علاقة بيه
بأمانة المخدرات مافيهاش اى متعة ولا فيها اى حاجة تبعث على السعادة
دى مجرد اشتغالات الناس بتشتغل نفسها بيها
المخدرات كل اللى بتعمله انها بتسحب الواحد ليها وتمسك فيه
المشكلة ان الناس مش لائية حاجة تعملها
الناس مابتستعملش مخها اللى ربنا اداهولها
كل واحد فاصل الباور عن مخه وعايش
والله يا جماعة فى قصص عن الناس اللى ادمنت المخدرات تحزن
ناس كانوا زى الفل وبئوا زبالة الزبالة
ربنا يعفينا كلنا
اللى ميعرفش يفرق بين الاوبن ميند والسفاله
