لوحدى

زمان كنت كتير بحس ان انا لوحدي، حتى لو كل الناس حوليا، أصل الوحدة مش معناها إن مفيش ناس.. الوحدة معناها كمان ان ماحدش من الناس دي عنده أي فكرة عن أي حاجة بتحصل جواك .. كإنك عايش في عالم ماحدش شافُه غيرك.  ماكنتش بعرف أشغِل كل الفراغات اللي في السطر الطويل اللي بيقولوا عليه مجازاً "حياتي" ،كنت مش راضية عن حاجة ولا عن حد، ومشاكلي كانت كتير، واللي راضية عنهم اكتشفت إني اساساً كنت غلطانة لما رضيت عنهم في يوم من الأيام... كنت مش لاقية حاجة بحب أعملها .. لإني أساساً ماكنتش أعرف انا بحب ايه
!

فجأة الدنيا حدفتلي هدية، صندوق كبير.. مليان هدايا ومفاجآت و حاجات حلوة ... موجود فيه إجابة سؤالي : أنا بحب ايه؟
ساعتها بالظبط عرفت إن ربنا بيحبني .. و قبلت الهدية :) و بقى صندوق الهدايا  ده هو أهم حاجة فحياتي
و مابقتش لوحدي :)

واحدة واحدة الهدايا بقت تكتر وتبقى أحلى ، بقيت كمان بكتشف جوايا حاجات حلوة ماكنتش أعرف انها موجودة، بطلت اكون راضية عن الناس الغلط. ومسحتهم بأستيكة وكتبت بدالهم ناس تانية . نسيت الوحشين، أو يعني تناسيتهم ... مش مهم .. المهم ان الدنيا بقت حلوة .. فيها ناس حلوة ... و بتحصل أحداث حلوة .. صحيح ساعات بلاقي شوية حُفَر في الطريق ... بس بنفض و اقوم عادي ... ولا كإن حصل حاجة .. دنيا و حلوة بأة
!!
ومش لوحدي :)

دلوقتي .. لما بحب أعمل حاجة .. بعملها ... برمي أي حاجة وحشة ورايا .. اي حاجة تضايقني ببطل أفكر فيها بعد 10 دقايق من حدوثها .. برقص كل يوم .. وبغني كل شوية ...  بحلف اني مش هاكتئب أول مابصحى الصبح ... بطنش أي حاجة وحشة ممكن تحصل حتى لو كانت من أهم الناس اللي في الدنيا .. أو من أغلى الناس عندي .. مهما حسيت اني لازم أزعل .. برضه بقرر مازعلش..  لإني اساساً مابقتش بحب أزعل .. أو تعبت من الزعل .. وبصراحة عجبني دور الفرحانة .. وناوية أكمل فيه شوية .انشالله كله زعلان وانا فرحانة لوحدي

أهم حاجة .. اني ماحسش ان أنا لوحدي ... بدعي ربنا دايما .. يا رب .. ماتحسسنيش أبداً إن انا لوحدي .. مهما حصل ... حتى لو كنت لوحدي !
يارب ماتحسسنيش إن أنا لوحدي

!