محدش بيكلها بالساهل

حيث اننا فى شهر كريم مفيش داعى ازعل نفسى بس كفاية  احكى على اللى حصل فى اول ليلة قبل ما تهل علينا ايام رمضان

بما انى واحدة فاضية وبشتغل فى شفت من 10.30 ل2.30 يعنى فى حكم الناس اللى فى البيت فى اجازة والمعروف عنى فى البيت انى ست بيت ممتازة 

 اية؟ اية؟......... بتضحكوا على اية ؟؟؟أما عجايب والهى

ايوة ست بيت من الدرجة الاولى  لولا بس انهم فى البيت قررو انى اعتزل المطبخ عشان الضحايا  لكن ماتش اعتزالى كان حاجة خفيفة كدة عشان يجبرو بخاطرى  ايوة ربنا يكرمهم ويعلى مقامهم الحمد لله بعد عناء وشقاء  سمحولى فى البيت انى اعمل جيلى

بس برضو مرضيوش يكسرو بخاطرى واهو برضو صلتى بالمطبخ متقطعتش فبقيت مندوبة السوبر ماركت يعنى انا بتاع الشوبينج كلة بس متهيلى هيطلبو منى استقالة قريب

 بما انى تخصص فى الوجبات الخفيفة يعنى الحاجات اللى باجيبها علب تونة وفراخ نص مقلية واندومى وبطاطس مفرزة  قالب السويسرول الجاهز اللى بشرف بنفسى على تقطيعة

مفيش مانع من شوية زيت وسكر ومسحوق غسيل وخضار مجمد وشامبو وعيش  وكلة من السوبر ماركت اللى لسه فاتح قريب وعاملى فيها هايبر 

ديك انهار ولو اننا كنا باليل الساعة 8 اليوم اللى قبل رمضان على طول نزلت اجيب مخزون رمضانى معتبر  

وكنت بتمشى كدة فى السوبر ماركت وقدام التلاجة طقت فى دماغى انى استفيد من العرض بتاع علب اللبن ايوة لازقين علبيتين فى بعض وكاتبين عليهم بسعر علبة واحدة

 اعترضت طريقى سيدة انيقة ومهذبة  (هو انتى عندك اطفال)

نعم؟

عندك اطفال؟

لا..... اشمعنا بتسالى لية؟

معلش اسمحيلى انا عن نفسى مبحبش النوع دة علية مواد حافظة كتير ومتهايلى السوبر ماركت عامل العرض دة عشان يسوقوة بدل ماهو محطوط فى المخزن

ابتسم وقولتها عندك حق ورجعت العلبة تانى

بعد ماروحت قسم الصابون والمنظفات وقبل ما امسك علبة الشامبو لقيتها مرة تانية بتضحكلى( اة محنا بقينا صحاب خلاص)

الشامبو دة امريكانى انتى شايفة ازاى الامريكان طايحين فى العرب والمسلمين وانتى حرة طبعا

ابتسمت تانى وقولتلها عندك حق وسبت علب الشامبو فى حالها تصورى دى طلع امريكانى مكنتش واخدة بالى

وكمان قلت بلاش الشاى دة انجليزى

ومسحوق الغسيل ألمانى

والشوكولاتة السويسرى غالية  ثم ان سويسرا جمدت الارصدة ولسه مبعتتش حاجة

واليابان متواطئة (الله الغنى عن ادوات المطبخ)

والهند معاك معاك عليك عليك (مش عايزة بهارات)

 وهولندا (اللى يجوز امى اقولة ياعمى ) مش عايزة سمنة

والدنمارك مالهاش دور فى السوبر ماركت دة صاحبة شالها كلها من الرفوف وكتب (فداك ابى وامى يارسول اللة)

فجاة لفيت حوليا اشوف الجبن الاجنبية والخضار المجمد كلة وارد أاوروبا

 والتونة والشوربة المجففة وارد شرق اسيا

هو العالم كلة بيكرهنا ولا ايييييييييييييييية؟

روحت نزلة قسم الحلويات (طظ فى الريجيم )

قلت للبياع

نص كيلو تشكيلة زلابية ورمش العين وصوابع زينب

ظهرت الست دى تانى معلش مش عايزة اضايقك بس الحلويات هنا مش طازة فية فرن قريب على اليمين قدام السوبر ماركت على طول بيبعها طازة وارخص

طبعا قولتلها اية؟

شاطرين قولتها عندك حق

بس جه فى دماغى سؤال غبى ياترى صاحب السوبر ماركت عمل فى الست دى أية عشان تتطفش الزباين بصنعة لطافة كدة؟؟؟؟

وقبل ما خرج قولت اعدى على تلاجة الفاكهة  قولت هنقضيها جبنة وبطيخ فى السحور وقبل ما امسك نص البطيخة المقطوعة الملفوفة بالازازواحطها فى العربية الفاضية اللى بجرها جت تانى الست الانيقة

مش عايزاكى تزعلى منى انتى حرة طبعا  مش قصدى اتدخل بس ماتضمنيش البطيخ لما بيتقطع بيفتل ويدبل كدة ومش صحى يعنى والميكروبات بقى انتى فاهمة قصدى اشترى بطيخة مقفولة احسن

ساعتة سكت ومطيت شفتى تقريبا ابتسمت  لكن كانت ابتسامة لزجة وصفرااااااااااااااا

ممسحهاش الا الصدمة اللى اتصدمتها عند الكاشير كنت انا بدفع تمن باكو جيلى

ايوة اللى كنت بلعب بية ماتش اعتزال المطبخ زى ماقولت وعلبة زبادى

وقدامى نفس الست المهذبة بتدفع 450 جنية تمن المشتريات المهووووولة من اللبن واللحمة والسمك والحلويات والعلب

المستورررررررررررردة

طب لو فرضنا انى خت موقف ومش حشترى الا المحلى حعمل اية  اذا كنت ااكتشفت انة مضروب والباقى كلة وارد اروبا

سؤال يطرح نفسه وياريت ياولاد الحلال تردو عليا هى  البلد دى بتصنع اية ؟

ابر بوابير جاز وطرابيش

بتضحكى ....اة لية؟

استجابت لأمها أخيرا ووافقت علي أن تقابل «العريس الصالوناتي» في النادي.. لم تضع أي من مساحيق التجميل لتصبح بشرتها الخمرية أكثر بياضا.. لتخفي عيوب وجهها أو تبرز محاسنه.. تحلت بثقتها الشديدة بنفسها.. وذهبت للموعد المرتقب.. يبدو أنه امتعض قليلا لأنها كانت تنظر له بعين ثابته لم تعطه الفرصة الكاملة لتفرس وجهها وجسدها.. عله يقول عليها الآن في سره إنها «بجحة».. تحدثا في كثير من الأمور.. هو أكبر سنا ومركزا علميا ومهنيا.. وهي أكثر ثقافة وإلماما بمجريات الأمور.. شعرت بخيبة الأمل في وجهه.. ربما لأنها شخصية مستقلة.. ولن تكون في نظر الرجال «زوجة مسالمة ».. انتهي اللقاء بابتسامة صفراء منه أدركت منها أن المشروع فشل قبل أن يبدأ.. «فرصة سعيدة أوي».. لتجيب بابتسامة واثقة.. «أنا أسعد».. قررت أن تمنح أمها هدنة من السلام النفسي وراحة البال.. لذا اجابتها عندما سألتها عن رأيها فيه.. «أنا معنديش مانع».. بعد مرور أسبوع.. سألت أمها بابتسامة لا تخلو من خبث.. «ماما.. إيه أخبار عريسي؟».. ثم انفجرت ضاحكة لتخفف من وطأة شعور أمها بالإحراج

مفيش نصيب

هاهاهاهاها

بتضحكى

اة .....لية؟

ممنوعة من كل شىء ...س: why؟؟....ج:keda!!

عزيزتي البنت: أهلاً ومرحبًا بيكي في عالم اسمه مصر..

 فى العالم ده هتلاقى ناس بتتكلم عن أفكار و بتتعمل حاجة تانية خااااااااااالص...للاسف الاسيف من واقع حياة صحبتى الانتيخ والانتيخ دى اللى هى اكتر من الانتيم ...الانتيخ جاية من الاخوة ...

احم احم...دعونا نبدأ:

الوااااان

بابا انا رايحة السينما انهاردة بعد الجامعة

.ايه سينما. معندناش بنات تروح سينما..

بابا طب ما أخويا بيروح.. اخوكي راجل لكن انتي بنت ونخاف عليكي.. طب ما انا كل يوم بروح الجامعة لوحدي وبرجع برضه لوحدي ومش بيحصلي حاجة..

 هي كلمة واحدة قلتها و مش هتتكرر..

ياحاج انا بمتحن بقالى شهرين وعايزة اشم نفسى شوية

خلاص ..اطلعى البلكونة

التوووووو

ماما اخويا فاقل الكمبوتر بالباسورد 

طب واية يعنى

اية يعنى هو الكمبيوتر دى بتاعه لوحده وانا لا

اة واما يجى كمان مش هيتفتح الا لما باذنة ..خلاص 

يعنى انا بنت البطة السودة يعنى

لا انتى بنت تيييييييييت

الثرررررى

.. بابا عايزة أخرج مع أصحابي بكرة ونقضي اليوم كله سوا..

 لا

 ليه.

. هتخرجي ليه أصلا.

. أنا كل يوم في البيت مش بعمل حاجة زهقت وبعدين أصحابي بقالي كتير ماشفتهمش.

. معندناش بنات تتسرمح في الشوارع هو انتي سايبة ولا ملكيش أهل؟؟؟ساعة ما تكون ماما فاضية أبقي أخرجي معاها

 طب ما ماما مشغولة في البيت وأخويا والشغل..

 خلاص.. ساعديها في البيت.. إنما ساعة ما تكون في ضرورة تخرجي أبقي أخرجي مع مامتك

وانتو يعنى بتعملو بيا اية فى البيت ماتسبونى اخرج انا مشفتش صحابى من زمان

ياسلام منتى خاربة بتنا تليفونات معاهم اية هو الكلام معاهم مبيخلصش

طب سبنى اخرج معاهم وانا مش هكلمهم فى التليفون

مفيش خروج....وادى التليفون كمان فين القفل بتاعة يا حاجة؟

الفور رررررررررر دى بقى من واقع حياة واحدة تانية بس مش انتيخ

بيعاتبونى علي كل درجة نقصتها عشان مدخلتش الكلية الفلانية

حاجة غريبة طب لية ؟ مع انهم كانو مقتنعين أن ربنا عايز كده من ساعة ما اخوكى مدخلش الكلية اللي هما كانو عايزينها..

الفاااااااااااااايف دى بقى من واقع الايف بتاعتى

 مفهمتش  توب اية اللي انتي منه لكن العريس اللي انتى ممكن تكونى موافقة عليه مش من نفس التوب ده

ودى هتفهمنى فيها لو سمعتى الحاجة فى مرة بتقول ده مش من توبنا زى منا سمعت الحجة بتوع لاختى الكبيرة كدة

كمان لايمكن تفهمي أبدًا أمك ساعة ما تقولك إن مطبخ شقة ابن أم عادل واسع وهتعرفي تحطي فيه التلاجة والغسالتين والميكروويف.. مع إن أمك نفسها مااتجوزتش بالحاجات دي كلها.. وشايفة إن الميكروويف بيجيب سرطان.. وأبوكي مش موافق عليه عشان شقته100 متر برغم أن هو نفسه اتجوز في شقة 80 متر ولسه عايشين فيها انتي وأخواتك..

ميس نجوى وممكن تقوليلى يا انتى (يعنى طنط)

قبل ما يهل علينا الشهر الكريم حصلت مواقف كتيرة جدا بس الواحد بيكبر ويطنش عملا بنصيحة قولت ياواد طنث خااااالث

فتحت الباب بعد رنة جرس طويييييييييييييييل  فلقتها قدامى  بكل شموخ قدمت لى نفسها وبكل زهو وكبرياااااء

انا ميس نجوى ااااااااوممكن تقوليلى يا انتى نجوى وانتى دى اللى هى طنط اذا كانت خالتى بقولها يا خالتى ولا طنط حتى يلا

ست فارعة الطول سمراء رفيعة لابسة تايير وشنطة شيك ونضارة كعب كوباية  وشكلها العام يوحى بانها مفتشة علوم فى مدرسة حكومية او موظفة فى الشهر العقارى

اممممممم او تقريبا كدة ممكن تقول انها تشبة موظفين مصلحة الضرايب

قبل حتى ما اقولها ادخلى دخلت لوحدها على اعتبار انها صاحبة بيت

وقبل ما ازود كلمة على   اهلا ..ازيك

عندك فيشة؟

نعم ...فيشة؟

ايوة عايزة اشحن الموبايل اصل الموبايل مهم اووووى عشان شغلى ساعات جوزى او ابنى يحبو يطمنو عليا

يلا عادى يا عم برضو احنا بلد حر ديموقراطى من حق كل واحد انة يشيل موبايل

لالالالالالا لو سمحتى اظبطية على نجووو اف ام

نجوووو اف ام؟

ايوة  انتى مش عارفة التردد بتاعة 100.6

نجوووو اف ام مزيكا على كيفاااااااااك بليز اظبطيها عليها

لا عارفها حاضر هظبطلك التردد عليها

اة قبل ما اشتغل هعمل لنفسى كوباية شاى  وياريت عالبال ما اعملها تكونى حضرتى لبس الشغل بتاعى

اوك

اة ياريت كمان يكون بلوزة وبنطلوووو عشان انا مبحبش الجلاليب

حاضر

اة اكيد هطلع البلكوووو ياريت تحضرى جييييب قصيرة عشان مبحبش امشى بالبنطلوووو كدة

ثانية واحدة للتوضيح

بنطلوووووو يعنى بنطلون

جييييييييب قصدها جيبة

والبلكووووو دى اللى هى البلكونة

نرجع تانى   .....

وبعد ما رتبت نفسى للشغل اهو برضو اساعد و,......اة نسيت اقول اصلا فى اية انا فى ازمة يا سادة والهى البيت عايز يتنضف وانا عملا بنصيحة واحدة صحبيتى اللة يسامحها ويبشبش الطوبة اللى حدفتها فوق رأسها شارت عليا شورة سودة انها هتبعت حد يساعدنى فى التنضيف رغم انى مبحبش الحكاية دى

من ذوقى قلت  اما افتح الراديو حاجة نسمعها

احب اعرفكم دى الشغالة الجديدة   صحبتى  بعتتلى ميس نجوى تساعدنى كل شهر مرة فى تنظيف البيت  بدل ام عصام اللى اختفت فى ظروف غامضة وفشلت كل المساعى السلمية والدوبلومسية فى اننا نعرف نتصل بيها او انى اقنعها ببث خدمتها الجليلة لامثالى من ذوى المهارات المنزلية احم احم المحدودة

ما علينا روحت ادور على حاجة تلبسها وسمعت صوتها بتصرخ فى المطبخ

يادوكتوووورة ..يادكتووورة

سبت اللى فى ايدى ورحت للمطبخ بسرعة لقيتها ماسكة المج بتاعى وحطت فية الشاى وبتقولى مش معقول انتى مش عاملة حسابك على مج احتياطى ليا انتى مش عارفة انى كنت جاية ولا اية انا فاكراكى فى انتظارى

بصيت للمج بكل اسى وانا بفتكر انى قولت لنفسى بما انى اشتريتة لنفسى فى الفلانتين  ايوة انا من الكيثيرات اللى قرروا يحتفلو بالسنجل داى ويجيبو لنفسهم هدايا وكنت ناوية والنية للة ان الكائن الانوى النادر اللى ممكن اسمحلة انة يشرب من المج دة غيرى  هو المأسوف على شبابة نصى التانى ان شاء اللة بس يلا اهى جت فى انتى نجوى

معلش  ثانية واحدة هجيب واحد تانى ...اتفضلى

روحت اطلع المكنسة وباقى ادوات الهلال والنجمة الذهبية  وسمعت نفس الانغام العذبة هلة عليا من المطبخ تانى

يادوكتوووورة يادوكتوووورة

مافيش كيك او بسكويت انأنأ فية مع كوباية الشاى

بلعت فريستى القوية والميول العدوانية وعملت نفسى ثابتة كدة وانا بقول

حضرتك بس خلصى المطبخ وانا ادخل على طول احطلك الفطار

نووونوو معاد فطارى لسة مجاش

سيبت المطبخ ورحت اجيبلها الادوات وبعد نص ساعة

يا دكتووووورة يا دكتوووورة

نعم

هو الظهر اذن

لا لسة ساعة الاربع

مش قالو انهم هيغيرو التوقيت الصيفى للشتوى

اة بس الكلام دة اتلغى

انا اخر مرة كنت فيها عند ناس بنضف وكان التوقيت بيتغير  ياااااااااااااة دى كان فى الصيف اللى فات بعد كدة كل مواعيدى كانت مظبوطة جدا انها ماتتوافيقش مع الحكاية دة عشان مواعيدى متتاخرش او تتقدم ساعة

طبعا انا كنت فى غنى عن سماع بلاعة الذكريات اللى انتى نجوى فتحتها عليا دى المهم بعد لت وعجن كتير تقريبا ممكن يساعدنا فى عمل كعك وبسكويت يكفى الست عزيزة ونبقى نحكى حكاية الست عزيزة دى فى التوبيك القادم ان شاء اللة

المهم فقدت تركيزى وعلى اخر جملة سمعتها منها

اة وبعدين اتكتب كتبها يا دكتورة بس من غير دخلة اصلة سافر بعد كدة على السعودية ايوة جاتلة فرصة شغل هناك  ومات وهو بيحج فالكفيل بعتلها الفلوس بتاعتىة 30 الف جنية حطيت 5 الاف للجامع والباقى فى البنك وعرفت واحد بعد كدة من على التليفون وحبتة بس من غير ماتشوفة هى حلوة بس عندها عرجة خفيفة كدة فى رجلها اصلها عملت حادثة وهى صغيرة والدكاترة قالو انها......

والهى ماعرف هى بتكلم عن مين

يووووووووووة دوشتك بالكلام

ابدااااااااااا

عشان كدة باشمهندسة شيماء بعتانى ليكى هى قالت لى انى مش رغاية وانتى مابتحبيش الرغى

وقعت سودة يا شيماء مش قولتلكم ربنا يبشبش الطوبة اللى ححطها بايدى تحت راسك

بس قبل ما اقتلها لازم اسأل هى بقت باشمهندسة امتى انا اخر حدودى علمى انها باكلوريوس تجارة ..لكن جابت ميكروباااز وبقت باشمهندسة امتى الله أعلم

اة اما باشمهندسة شيماء دى بيتجيب ناس غيرى يشتغلو معاها اصل انتى مش عارفة..

لآلآلآلآلآلآوالهى عارفة وربنا عارفة ابوس ايديك بقى انا عارفة وحافظة شيماء دى زى كف ايدى

بس واضح ان صوتى كان عالى حبتين تقريبا كنت بصرخ فخرج الجيران الاعزاء من شبابيك المطابخ وسألأونى سؤال واحد تقريبا كدة فى حاجة يا دكتووورة ؟ بس بفعل صدى الصوت اللى فى المنور مع عدم النظام( لازم يتكلمو فى نفس واحد مش معقولة كدة)  سمعت السؤال تقريبا خمس سبع مرات

بس بما ان اليوم خلص والنبى ياحزمبل           

 فقدت ارغى معاهم اشمعنا انا وقتى ضاع مع ميس نجوى لا وايةدخلتها فى الحوار عشان استعين بقدرتها الرهيبة فى الرغى واللت والعجن

واكتشفت ان الوقت المستقطع من اليوم كان سبع ساعات بس بعدها خدت المعلوم وسابت البيت يضرب يقلب حتى مج الشاى انا اللى غسلتة بس حسيت وانا بغسلة بالانتصار  اكيد عارفين لية

عشان محطتش معاة كيك او بسكويت نتأنأ فية

حوار عائلى خنيق ,,,,اكتشف وجود طنط حشرية فى العيلة

رحت واحدة كدة من التجمعات العائلية الظريفة اللي بعد الإلحاح الجامد جداً بتاع ماما
اضطريت تلبية لنداء الله والوطن وبر الأم الغلبانة التعبانة معانا من زمان أوي..

المهم رحت وياريتني ما رحت ..

قريبة عزيزة(طنط حشريةودى بقى مش بتحشر نفسها وتجيب عريس نووو دى بتحشر نفسها فى الموضوع وتقطم فيك وتذلك ) ماسابتنيش في حالي.

> إزيك يا حبيبتي..

- الحمد لله يا طنط.

> انتي بقي عندك كام سنة دلوقتي يا حلوة؟

-واحد وعشرين ونص يا طنط.

> ياه ده انتي كبيرة اهوه، امال لسة متجوزتيش ليه؟ فاكرة عشان فلحتي في العلام يبقي خلاص؟، لو سيبتي نفسك يا حبيبتي هتكبري وتعنسي ومتلاقيش اللي يبص في وشك.

......وبعد فترة من الصدمة

- حاضر يا طنط هتجوز إن شاء الله ..

> طب وبالنسبة لشغلك مش بيدخلك دخل كويس برضو؟ أنا باطمن عليكي بس يا حبيبتي..

- عادي يعني يا طنط .. أنا مش بابصلها من الناحية دي وخصوصاً إن أنا أحسن من غيري كتير مش لاقيين شغل خالص..

> آه بس لازم تعرفي انتي هتصرفي علي ولادك منين امال، عشان اللي هيتجوزك يبقي عامل حسابه من الأول.

(ده علي أساس إن اللي هتجوزه هستته في البيت يطبخ ويغسل وأنا اصرف عليه والله دي تبقي كملت)

المهم معرفتش اخرج من الموقف العصيب ده ازاي ..

 بس بصراحة أعصابي فلتت وقلتلها بصريح العبارة كدة انتى مالك وش

> علي العموم أنا خايفة عليكي وعايزة مصلحتك وخصوصاً وانك مبقيتيش صغيرة وقدك متجوزين ومخلفين ولو فضلتي مخرجة الموضوع ده من دماغك هتلاقي نفسك متجوزة أي حد عشان مجرد الجواز، متنسيش ضل راجل ولا ضل حيطة.

- إن شاء الله مش يلا بينا يا حجة سوسو

ودرت امى ( وانا بزغرها) اة يا حبيبتى يلا بينا عشان نلحق مشوارنا اصل انا الضغط عالى عليا وووو....

المهم استئذنا من القعدة المهببة دى

ورغم إني مش مقتنعة بالكلام اللي الست دي قالته كله وكنت عايزة أمشي من قدامها بأي طريقة إلا أني فضلت متضايقة باقي اليوم معرفش ليه...

اللي هي قالته مش في خطتي خالص، أنا عايزة أشوف مستقبلي ولو قابلت الحب يبقي كويس جداً وخلاص...

بس كلامها خنقني ومعرفتش أنساه، يمكن عشان اللي اتعلمته من خلال خبرتي الصغيرة في الحياة إن ساعات بتأتي الرياح بما لا تشتهي السفن؟؟ معرفش

علي العموم المستقبل بإيد ربنا .

العيب مش عليك ...العيب على ردعليك

وحوى يا وحوى ايوحا وكمان وحوى ايوحا

افرحو يا بنات يلا وهيصو رمضان اهو نور فوانيسة
بمناسبة ان رمضان قرب ويادوب فاضل أسبوع علية فكل القنوان عمالة أعلانات جبارة
من غير ما تلف ولا تحتار مسلسلاتك عندنا  من رمضان اللى فات رمضان يقربنا ..وأسال مجرب ولا تسأل طبيب

المهم مطولش عليكو قولو طولى اانا بتفرج على اعلانات مسلسلات رمضان أفتكرت حاجة كدة حصلت فى رمضان اللى فات

فى يوم كنت بتنقل كدة بين القنواتع الفضائية بتفرج على المسلسلات  الاقيلك هند صبرى متشحتفة على عريس يا كبد امها  قلت اية الكلام الفارغ دة مقيش اكتر منهم فى البلد وكمان عملالى فيها صيدلانية هو الحكاية ناقصة مش كفاية البنات حولايا عمالين يكرو واحدة ورا التانية وانا اللى مبلطة فى الخط وكأنى مش قعدة معاهم فى نفس الخيط

يلا ياعم بلاهم ز..قلبت القناة لقيت خالتك غادة عبد الرازق بترقص والمسلسل أسمة زهرة واجوازها الخمسة فى عين العدو

اية الكلام دة بس يعنى لو كان اللى قبلية خرف بلدى يبقى دة خرف هندى

يعنى واحدة مش لاقية والتانية مدوباهم خمسة لا ياعم صيامنا حيضيع نشوف حاجة تانية 

وقنوات تشيلنى وقنوات تحطنى ومتهيلى كل القنوات اتحدت مع بعضها وغيرت اللوجو بتاعها وحطت كلمة حصرى 

الاقيها مكتوبة على كل القنوات

لحد ما ربنا كرمنى وهربت من الوجبة الدسمة اللى فى المسلسلات اللى بتجيب تخمة لعقلى 

.. استوقفني يومها برنامج ديني من  اللي يصر أصحابها علي إلصاق لفظ ديني بها، مع أن البرنامج من مثل تلك التهمة بريء براءة الذئب من دم ابن يعقوب..

وأنا بطبعي مبتعجبنيش فكرة طرح الأسئلة علي الشيوخ أو القساوسة علي الهواء فى الشاشات، واعتبرها من حاجة كدة زى انى اجيب دكتورقدام الكاميرا ليجيب ويصف الدواء لمرضى مشافهمش ، ولم يأخذ في الاعتبار اختلاف حالاتهم وظروفهم.. أما الأكثر  فهي نوعية الأسئلة الموجهة من المتصلين البسطاء الطيبين!

كان السائل يسأل الشيخ عن حكم الدين فيمن يبتلع ورقة في نهار رمضان، ورغم أن الناس في العادة ما بيبلعوش الأوراق في شعبان أو رجب، ولكن يبدو أن هواجس بلع الأوراق تهاجمهم عادة في شهر رمضان!

 كل دة والشيخ هااااادى.. ولا يستفزه السؤال.. ولا بيشتم السائل علي نوعية هذه الأسئلة التي لا ترقي لمستوي الشهر الكريم، ومسمعتوش بيقولة في الدين أمورً أهم بكثير من بلع الورق وبلع الريق!

كنت مستنية متصلاً يسأل عن حكم الدين فللى يسيب القطارتولع.. والسفن تغرق.. أو رأي الشرع فللى ينهبو أموال الناس ويهربو ويختفوولا أجدع فص ملح في كوب ماء..

وبما ان دة محصلش فعلا تعمق أيماني أكثر بحكمة «سوفوكليس» علي لسان «أوديب» في نهاية مسرحيته أوديب ملكاً لما قال: إن أعظم ما تجود به الأقدار علي الإنسان ـ عندما تمعن النظر في كل شيء ـ هو ألا يولد بالمرة.. ويأتي في المرتبة الثانية بالتأكيد.. علي فرضية أنه ولُد بالفعل.. أن يسارع ما أمكن بالرحيل إلي حيث أتي!!

يارب المدفع يضرب بقى دى حاجة تفطر

ياصفايح الزبدة السايحة...يابراميل القشدة النايحة

الحكاية كلها بدأت لما نزلت الجامعة...ايون قصدى يعنى لما حسيت انى فعلا بدأت انزل مكان بعيد عن البيت  بأعتبار ان مرحلة التانوية دى جزء من طفولتى العجيبة اللى يادوب فيها كل حاجة قريبة وكل مشوار مياخدش خطوتين والجيران كلهم صحاب امى وابويا

واصدمت بالواقع ممكن اى حد يتفة اللى باحساس بالغربة انى حمشى لوحدى او انى اروح مكان بعيد عن حتة اتربيت فيها والناس كلها عارفنى بس برضو انا بحترم تفاهتك يا تافة

رتبت أموري للنتقال في هذه المدينة العجيبة، . بدرس فى كلية صيدلة اللى لما دخلتها كل الناس سمونى البقالة  لا تريحني التسمية كثيرا لكنها لاتزعجني علي أي حال،

  في سنة كنت تعلمت الكثير، تعلمت أن أثبّت عينيّ طوال الوقت وكأني أنظر إلي لاشيء، أنظر إلي مكان ما «علطول». أنزع الابتسامة عن وجهي في كل انتقالاتي ذهابا أو أياباً من أي موعد .

لو كانت الكلمات دايما صادقة فأكيد أنا مليون برميل من «قشطة» وأنهار كاملة من «يا عسل» اللى بسمعها طول الوقت من كل الأعمار. 

 أحيانا بكون عايزة اتمشى فى الشوارع ، أمشى من غير  هدف أفكر احيانا في أن أقعد علي مقعد في حديقة أو أن على العشب الأخضر لكن القعادلوحدك  هو التصرف الأكثر حماقة هنا.

 التعرض للإهانات الصوتية من كل زمارة علي الرصيف، من كل سيارة في عرض الطريق وتعليق قادر أن يقلب مزاجك الجيد في أقل من ثواني..

بعد فترة مش كتيرة من دخولى الجامعة  ألاحظ اد اية ضيقة بناطيل البنات، أحدق - مع الولاد - في هذه الثنايا والتفاصيل الواضحة. أضبط الإيقاع المقسوم للخطوات علي الحجاب اللى مش فهماة معناه لكل بنت تمشي في الشارع. أمشي وأمشياللقىفجأة في عرض الطريق سيقان عارية

 طب هى الولاد كدة بقى عندها حق انها ترمى كلمة لكل واحدة تعدى جنبهم ..؟؟

عموما مش هدخل فى موضوع حملة احترمى نفسك ووسعى البنطلون ولا حملة احترم نفسك دى برضو زى أختك

صيدلة ....خدعوك فقالوا فقالو فقالوا .......هما قالو اية صحيح؟

طول عمري بحب التعليم

 أصل أنا واد في العلم قديم

 كان مجموعي في الثانويه حاجه بتاع سبع...ه و تسعين في الميه

 قلت يا صيدلة أما بلاش شغلانه غيرها ما تنفعناش

 أول سنه كان كلي حماس قافل علي نفسي الترباس

 أحضر سكشن أسلم شيت كنت بنام زي الكتاكيت

أول ترم عدي علياأتمنيت أرجع ثانويه

أخد نجمه وأغني بلادي أخد فسحه وألعب عادي

 بس يا عيني مش وقت رجوع

أنا عيني خلاص عالمجموع

 أول سنه عديتها نضيف والمجموع كان برضه ظريف

 جبت يا دوب سبعين في الميه راحت فين أيام ثانويه؟

ومن يوميها أنا أتجنيت ولا عمري في حاجه عديت

بكتب أسمي و أطلع تاني تعمل أيه لو كنت مكاني؟

حبه بحبه بقيت بلاص بس يا ناس مرفوع الراس

 أخد الصفر وأحاول تاني أنا يائس كده ليه وبعانى

 نفسي أجيب لو يوم مقبول حد يقولي مين مسئول؟

أن أحنا في ساقيه بنتعلم ولا راضي حد يتكلم

 خلينا مشيين جنب الحيط عاشقين أوي فن التخبيط

 حاول تفهم مني كلامي ولو ما فهمتش حعيد من تانى

احدي مقالات كتاب "فانلة داخلية تتسع لعدة أشخاص"

تعتبر الستاتس من اهم مميزات الفيس بوك .. ولأن الواحد بقاله حوالي 4 سنين عالفيس فبيقرا ستاتسات كتير جدا من ناس كتير جدا .. وبحكم خبرتي الضئيله قدرت ااقسم الستاتس اللي بيكتبها البعض إلى عدة أنواع :

----------------------------------------------------
-
ستاتس من نوع : هسيبكو على ناركو ..
------------------------------------------------------

ودي ستاتس تحس ان صاحبها عايز ياكل قلم على قفاه عشان يتعدل .. فعلاً .. الستاتس دي ميزتها انها لغز .. متفهمش صاحبها عايز يقول ايه ولا قصده ايه .. يعني مثلا .. كام واحد فينا لقى ستاتس لواحد من الفريندز كاتب:

"بجد حاجه تنرفز.. بس انا اخدت قراري" ..

طب ايه اللي نرفزك وايه القرار؟؟ .. متعرفش .. وتلاقي على الستاتس اللي زي دي سبعين كومنت من الفريندز .. تلاتين كومنت منهم علامات استفهام.. وتلاتين علامات تعجب.. والباقي بيحاول بقدر الامكان يستفز الواد يمكن يقول حاجه.. وممكن تلاقي في الوسط كومنت من فريند لطيف شكله عارف الموضوع بيقول :" مش مشكله .. شوف غيرها يا فوزي ولما تلاقيها كلمني وانا هزبط الباقي" ..طب يشوف ايه ويزبط ايه ؟؟؟.. متفهمونا ياجدعان!! .. ولكن في الاخر تلاقي صاحب الستاتس كاتب بعد 100 كومنت اتبعتوله "برضه مقدرش ااقول حاجه غير حسبي الله ونعم الوكيل " .. وتتكرر حدوته الكومنتات تاني .. انت بتقول حسبي الله على ايه ؟؟.. فيه ايه؟؟ .. و في الاخر خاااالص بتلاقي ان صاحبنا كاتب " يا جماعه متخدوش في بالكو .. ده موضوع شخصي" .. طب طالما هو شخصي فالقنا ليه ع الفيس بوك .. حاجه تنرفز..

تحليل شخصية صاحب هذا النوع من الاستاتس :
حمار


----------------------------------------------------
--
ستاتس من نوع (انا في الحمام دلوقتي) ..
------------------------------------------------------

زي ما فيه ناس كانت بتعتقد ان الارض مركز الكون .. فيه برضه صنف من الفريندز بيعتقد ان هو نفسه مركز الفيس بوك ومنه بيتفرع كل الفريندظ حول العالم .. ستاتس (انا في الحمام دلوقتي) صاحبها بيتوهم وبيتخيل ان الناس بتصحى الصبح .. بتغسل وشها .. تضرب النسكافيه ..ثم تبدأ رحلتها في الدخول على بروفايله الشخصي .. هو بيتهيأله كده ..وبيتخيل ان الناس دي بتشوفه يا ترى عامل ايه؟؟ واحواله ايه؟؟ وكاتب ايه؟؟ .. واكل ايه ؟؟ وشرب ايه؟؟ وعمل ادد لمين؟؟ .. وعمل كومنت على مين؟؟؟ .. ولذلك بتلاقي صاحبنا ده بيتحف الناس بكل ما هو جديد في حياته .. هتلاقي دايما الستاتس بتاعته بتتجدد سبعتاشر مرة في اليوم وهتلاقيها زي :

- "النهاردة كان يوم جميل .. انا اتبسطت قوي مع أصحابي .. احب اشكر سُها وتُها وبُها عالوقت اللطيف ده "

- " بجد زهقان اخر حاجه"

- "ابويا طلق امي وقتل حمايا"

- "ادعولي عشان امتحاناتي قربت"

- "انا شلت مادة .. حسبي الله ونعم الوكيل"

- "تواليت الحمام لسه متصلحش .. بس اكيد فيه حل للزنقة دي"

ازاي تميز صاحب هذا النوع من الاستاتس :

صاحب الاستاتس دي هتلاقيه :

1- لاجيء ع الفيس بوك .. صبح وليل وظهر وعصر ومبيقومش خالص ..كل ما تخش تلاقيه عالشات .. وفي الوقت اللي انت مش قادر فيه تلاحق على تلاته او اربعه في الشات هتلاقيه هو بيكلم سبعين واحد اون لاين في نفس اللحظة وبنفس الكفاءة ..

2- عنده 200 البوم مليانين صور .. صور في كل حته وبيغطوا انشطته اليوميه .. البوم صور مع العائله والبوم مع الفريندظ .. والبوم مع الفريندظ الغاليين قوي .. والبوم الرحلات والبوم الرحلات الكوول.. والبوم الخروجات الميه ميه ..والبوم احلى صحاب .. والبوم رحلة شرم الشيخ .. والبوم رحلة العين السخنه.. ده غير اربعتلاف صورة بروفايل بكتشر كلها شبه بعضها وبنفس الوضعيه بيبدلها سبع مرات في البروفايل كل يوم .. وهتلاقي صور البروفايل بتاعته غالبا هي شرح للستاتس .. ..يعني هتلاقي صورة في الجامعه .. صورة تانيه وهو بياكل في الجامعه .. .. صورة وهو جوه البيت ..صورة وهو نايم في البيت .. صورة وهو بيتليف في البانيو .. صورة وهو لافف الباشكير ..صورة وهو قاعد ع التواليت .. وهكذا ..

3- هتلاقيه مشترك في كل الجروبات اللي طلعت تحت اسم : "اعرف مين بيشوف بروفايلك؟".


4- هتلاقي دايما عنده البوم اسمه :

just me

----------------------------------------------------
--
ستاتس (الكآآآبه) ..
------------------------------------------------------

كل واحد فينا هيلاقي تلاته او اربعه من الفريندز عنده قمه في الاكتئاب الأزلي .. مبيكتبوش حاجه غير القرف والنكد والاحباط ..وتلاقي دايما الستاتس بتاعتهم زي :

" زهقت من كل حاجه .. الحياة بقت مقرفه "

" انا محبط .. زعلان .. مضايق"

" مفيش حاجه نافعه .. هولع في روحي "

صاحب هذا النوع من الاستاتس بيتعامل مع الفيس بوك على انه قعدة كابينيه .. يخش يرجّع النكد اللي جواه ويطلع يمارس حياته الطبيعيه .. ومش فاهم ليه ..

******ازاي تميز صاحب هذا النوع من الاستاتس ****

- علطول هتلاقيه حاطط صورة بروفايل دمويه و كئيبة موت ..زي صورة اتنين وقت الغروب بيحضنوا بعض الحضن الاخير والدم مطرطش من جنابهم ومغرق الدنيا وهمه مكملين حضن عادي (ازاي؟ مش قادر اعرف) ..ممكن تلاقيه حاطط صورة شاب امور معندوش اي مشاكل في الحياه غير ان فيه خنجر راشق في صدره وفيه دم نازل ع الارض على شكل قلب كبير (برضه مش فاهم ازاي) ...ممكن تلاقيه حاطط صورة واحد وواحده لابسين اشيك حاجه في الدنيا وحاضنين بعض و جنبهم عصير فرجلو واكل ديلفري ومستنين قطر من بعييييد جي يموتهم سوا ....


----------------------------------------------------
------------------------
ستاتس (اذا احببت شيئاً بشدة فاتركه .. فان عاد اليك فهو بالتأكيد سيكون بنطلونك ) ..
------------------------------------------------------------------------------

(اذا احببت شيئاً بشدة فاتركه .. فان عاد اليك فهو ملكك للابد)..

فيه اشاعه بتقول انك لو مكتبتش الستاتس دي مرة او مرتين في حياتك ع الفيس بوك ممكن تفقد الاكونت بتاعك للابد وعمره ما هيرجعلك تاني ....

بس فعلاً مش عارف ايه سر حب الناس الشديد ليها؟؟؟؟ .. كتير قوي بيكتبوها!!!.. هتلاقي تسعين في الميه من الفريندز عندك جه عليهم وقت كانوا كاتبين الاستاتس دي .. و مش عارف ليه دي بالذات دوناً عن حكم وامثال الدنيا كلها؟ .. وايه اللي الناس عماله تفقده ومبيرجعش ولو رجع هتملكه للابد؟؟.. ايه سر حب الناس الغريب للستاتس دي؟؟ .. بتتكتب كتير.. وليها سبعتاشر جروب .. وسبعمية بايج .. ومية اكونت .. طب ليه ..

تحليل شخصية صاحب هذا النوع من الاستاتس :
والله فعلاً مش عارف ..

----------------------------------------------------
--------------
النوع الأخير .. ستاتس (هعقدك في عيشتك يا حيوان) ..
-------------------------------------------------------------------

هتلاقي عندك غالباً فريند محترف انه يكتب ستاتس بالانجليزي ومكلكعه التنين متفهمش منها حرف .. المشكله ان بيبقى فيها كلام مجعلص والمشكله الاكبر انك بتقدر تترجم كل كلمه لوحدها لكن لما تربط الكلام مع بعضه تلاقيه مش راكب .. بس اللي يطمنك ان فيه ناس قليله عاملين عليها لايك .. عارف لو كتير عاملين لايك يبقى انت لازم تراجع نفسك .. خد كورس كونفرسايشن في الجامعه الامريكية .. او خد تويفل عشان تمتحن وتفهم الاستاتس اللي زي دي .. فيه حل تاني .. اعمل لايك وانت ساكت ولا من شاف ولا من دري وعنك ما فهمت .. او اعمل لصاحبك بلوك عشان ميفكركش بخيبتك القوية وكله في سبيل انك تخلص من الالم النفسي اللي بتعانيه لما تلاقي هذا النوع المكلكع من الاستاتس ..

كيف تميز صاحب هذا النوع من الاستاتس ..
هتلاقيه غالباً مدارس لغات .. وانت يا حبة عيني .. تعليم مجاني ..

بس خلاص .. مفيش تاني ..

مباشر من الصيدلية

دخلتى الصيدلية واحدة من الاطفال المتشردين اللى بيسرحو فى الشوارع بتقولى والنبى يا داكتورة عايزاكى تكتبيلى دوا غالى فى ورقة عشان اشحت بيها ومتخافيش حنصص مع بعض لولا ان شكلها كدة كان ناوى على شر مكنتش هكتب حاجة بس كتبتلها فى الورقة الطفلة دى عندها مرض معدى سيب الورقة واجرى بسرغة رجعتلى بعد نص ساعة وادتنى خمسين قرش ..مش قولتلك هنصص وبعد شوية جت تعيط قالتلى الواد اللى بيسرح معايا فى سرق الورقة وقطعها
والنبى اكتبيلى واحدة تانية
طيب يابنتى
كتبتلها نكتة رجعت بعد شوية تقولى كدة يا داكتورة الست كانت هضربنى بالشبشب
بتكتبيلى نكتة وكمان بايخة
مأنقذنيش من ايديها غير استاذ محمد الاسيستنت اللى معايا
كدة ممكن استبدل المثل اللى بيقول علقة تفوت ولا حد يموت ...بالجرى نص الجدعنة

يتبع.....D:

من اعماق الذاكرة (صيدلة خدعوك فقالو)

هنام
:D
ـــــــ
هنام اخيرا 18ساعة ورا بعض !! ,, عادي كده ؟؟

...شعور مش هتقدر قيمته غير لما تقعد 30يوم تمتحن فى صيدلة,,

وقبلهم 30 يوم فى العملى
اما 30 يوم الامتحان  فهما 30 يوم من الجرب وعدم الاستحمام

 الواحد ملوش نفس ياكل حاجه
ومع ذلك الواحد بقي بكرش فيهم

 عايش وسط الكتب والديدان والكوالتى والفارما والتكسو والبايو اسى والعقاقير بكل انواعها وكل المواد اللى هى فى الاول وفى الاخر نفس المادة بس بيضحكو علينا ويغيرو اسمها
الواحد بقي فيهم بصمجي ,, بيحفظ بتخلف

30ايام بضطر ادخل علي جروب الدفعه الاومليت
 ايام شلل في الحياه

وياريته بعد ده كله بفايده ,, الواحد بيغلط بردو
مش عارف ده غباء مني ؟؟ ولا ذكاء من الاخرين ؟؟
:D

الحقيقه الوحيده اللي كنت متأكدة منها انه مش ذكاء من الاخرين
:D

تأكدت اخيرا انه مش غباء مني الحمد لله
كليتنا دي عشان تجيب فيها تقدير ومتغلطش

لازم تدح ,, تدح بضمير

ولازم يبقي عندك مهارات في الغش
مهارات قادره علي انتشالك من تقدير جيد لامتياز

مهارات ليست بصعوبه ,, مهارات غشاشي الثانوي والاعدادي
بتوع تصغير الملازم ,, والكتابه علي الحيطه بزاويه ما يشوفهاش المراقب


كل ما تحتاجه ,, انك تقعد في مكان استراتيجي ( فيه دحيحه كتير)
و يكون عندك جرعه زايده من البجاحه
:D
ومتخافش حتي لو اتمسكت
هتقوم من البينج اللي كنت قاعد فيه ,, وهتقعد في كرسي لوحدك قدام وهتكمل الامتحان عادي
:D
و الغريب ان كل الدكاتره في كل المواد ( بيعملوا نفس الحاجه) بيقوموك من البنج المقدس وبيقعدوك علي الكرسي الكوخه

الامر الذي يؤكد ان كلهم عارفين النظام ,, وكانوا مقضينها غش
:D
ــــــــــــــــــــ
امتحانات كليتنا العزيزه
ما هي الا اختبار لنظريه
" كيف تصنع الغباء"

لما الامتحان يبقي عباره عن اسئلة من النوع المعروف بالام سى كيووو وانت بتتعرف عليها (لاول مرة فى حياتك)
و تفضل بقي ليله الامتحان تذاكر وتعلم في الاجبات
 ولا امتحنات العملى وبذات اللى فيها داتا شو وصور
الله الله على الصور
" فيها دايره حمرا كبيره"
" فيها نقط زرقا و دواير حمرا كتير"
الصوره تبقي كذا لما الفراغ الابيض يبقي كبير
و تبقي كذا لما الفراغ الابيض يبقي صغير
ودي تبقي نقطه جدليه في الامتحان
:D
جالك فراغ في دماغك يا بعيد ي اللي حاطط الامتحان
ــــــــــــــــــــودى غالبا  فى امتحنات مادة التكوسو اللى هى كانت فارما بس كبرت شويةــ
امتحان تاني ,, تدخل المعمل تفضل تشم فيالبودر
و الدكتور يسألك ,, ها ريحته عامله ايه ؟؟
حلوه ولا وحشه ؟؟
:Dولا لما تدوق بقى مسكر ولا مزز  يعنى حتخرج فاقد حاستين الشم والتذوق
طب وايه رأيك في لون البودر ده بقى  ؟؟
كدة كمان حاسة النظر
ـــــــــــــــــ
امتحان تالت ,, تفضل تذاكر في ديدان
وايه الفرق بين البيض بتاع الديدان دي ؟؟
:D
مع اني شايفة ان كله في الاول وفي الاخر ,, بيييض
ــــــــــــــــ
امتحان رابع تفضل تحفظ زي الحمار في اسامي ادويه
و بعد ما الامتحان يخلص ,, بيجيلك فقدان ذاكره
طب ايه لازمتها
ــــــــــــــــــ
ولما بقى يبقى هندك معيد من ولاد الحلال اللى تقريبا مش عارف ان شييييييينج بتاعة ممكن تضيع مستقبلى فى امتحان العملى اللى غالبا ببقى معتمدة علية هو الشفوى
ونظبط بعدها النجاح فى البيبر:D
انا لخطأ تقني ما ,, بغلط كتير في الامتحان ده مهما كان سهل ومهما كنت مذاكرة
:D
ـــــــــــــــــــ
بعد ده كله ,, اعتقد من حقي ان انا انام 18 ساعة بعد المتحان واخد دش عشان المادة تنزل من شعرى
و اقعد علي النت
و اسمع الالبومات الجديده

هسمع - استغفر الله العظيم سامحني يارب- البوم تامر حسني
و البوم حاتم فهمي
و البوم اكمل
:D

و اذاكر من اول بكره لامتحان  النظرياللى بعدية  بقي

من واقع حضورى محاضرتين فى جامعة مصرية

أحم أحم ...من واقع حضورى محاضرتين فى احدى الجامعات المصرية ومفيش داعى انى اقول انها جامعة الزقازيق
وبكرر برضو مفيش داعى اقول كمان انها كلية صيدلة ..واحد يسالنى لية اقولة لما تقرى يا خفيف حتعرفها لوحدك
دى حتى أسهل من الفزورة اللى بتيجى فى القنوات اللى شغالة على الالش وبالمناسبة ممكن اقول اشهر فزورة منهم
)فاكهة لونها اخضر ومن جوة حمرا وفيها بذر اسود تبقى اية (
عموما مش موضوعنا

بما انى مش من الناس بتوع بنحضر محضرات والجو دة واعتقد انتو عارفنى مش هتكلم عن نفسى كتير فهقول حاجة من اعماق ذاكرتى يوم ما تهفيت وحضرت محاضرة مع واحدة يلا بقى ربنا يسمحها ويبشبش الطوب اللى رمتها فوق رسها بعد خلصت المحاضرة دى انا انتقمت منها انتقام  واديتها لقب وهى شهيرة بية لحد دلوقتى وعارفة نفسها ..اييوةياختى متعمليش فيها عبيطة
بعد تناحة ورزالة الحقيرة دى ومتهايلى دلوقتى هى عرفت نفسها
طبعا كلنا لينا حد كدة فى وسط صحابنا عيل كدة متعرفش دماغة راكبة شمال ودماغة والف سمكة ليحضر محاضرات دى بقى واحدة منهم وبعد المرات المعددوة اللى دخلت فيها المدرج وسبحانك يارب كل مرة بيكون بسببها اكتشفت الاتى
جامعه مصريه
:D
ـــــــيعنى اية ياحبيبى ـــــــــ
يعنى من الاخر
لما تيجي بعد ميعاد المحاضره ب 5 دقايق و الدكتور ما يدخلكش المحاضره
في حين ان الدكتور ممكن يجي بعد ميعاد المحاضره بساعه ويدخل يدي المحاضره عادي
...

لما الدكتور يقول كله يقفل تليفونه واللي تليفونه هيرن هيطلع بره
في حين ان الدكتور ممكن تليفونه يرن
بنغمه العنب لو الدكتور بكرش وبيحب الاكل
أو بنغمه الدنيا زي المرجيحه لو الدكتور قرفان وزعلان شويه يا حبه عيني


لما الدكتور هو اللي بيحدد المنهج
وهو اللي بيعمل المحاضرات
وهو اللي بيعمل الكتب
وهو اللي بيعمل الملازم
وهو اللي بيظبط الغياب
وهو اللي بيحط الامتحان
وهو اللي بيصحح الورق
ده كمان الدكتور عنده جناحات وبيطير

لما الدكتور طول ماهو بيشرح يقولك الكلام دة احنا مش مطالبين بية مش عايز حد يسالنى لانى انا نفسى مش فاهمة اوى
وتفوجىء بالامتحان جاى فى مستوى الطالب السوبر مان
دى على اساس ان الكتور ذاكر من ورانا وحط علينا فى الامتحان

لما تفضل طول السنه تذاكر وتدح ويجي الدكتور في الاخر يقولك
ذاكروا اول 50 صفحه والباقي ملغي
 ودى حصلت مرة واحدة فى حياتى فى ام الكلية دى فى قسم العقاقير وبرضو ربنا رزقنى فى الشفوى بعيل غبى بسببة دكتور اكستيرنال استلما اسئلة فى الجزء دة ومقولكش بقى ..صحرا السؤال كان بيترمى ويلف علينا ويرجع للدكتور تانى
لما تبقي في كليه تجاره ويجيلك امتحان من كليه زراعه بالغلط
و تنجح و تجيب امتياز ,, ما تعرفش ازاي ؟؟
 ودى حصلت مع واحدة صاحبيتى
لما تبقي في لجنه امتحان عملى او كويز وحد يتمسك وهو بيغش
و الدكتور يقولك هات الواد ده خليه يقعد قدام
و يخليه يكمل الامتحان عادي


لما الامن بتاع الجامعه لما يلاقي ولد راكب تاكسي ,, يبقي ممنوع دخول التاكسي الجامعه
في حين ان لو بنت راكبه التاكسي ,, يبقي اتفضلي يا موزه
ولو دكتور راكب التاكسي ,,يبقي اتفضل يا باشا


لما الامن لازم يشوف كارنيه كل ولد عشان يدخل ,, علي اساس ان الواحد بيحب الجامعه اوي هيروح يتلزق فيها
في حين ان اي بنت ,, اتفضلي يا موزه ,, انتي لوحدك كارنيه

والحتة دى حقد دايما التوءم الشرير اللى عايش معايا (اخويا) بينفسن عليا بيها

لما تحل في ماده كويس اوي وتلاقي نفسك شايلها
و تعُك في ماده وتلاقي نفسك جايب تقدير



لما تلاقي ولد عايز يفتح حوار مع بنت
يقولها ممكن كشكول المحاضرات بتاعك ؟؟

دى بقى شوففتها فى المسلسلات القديمة بس مش عارفة لسة شغالة ولا لا ياريت اللى يعرف يفدنا فى الحوار دة

لما تلاقي الدكتور رئيس القسم
و ابنه دكتور معاه في القسم
و ابن اخوه دكتور بردو في القسم
و بنت اخته دكتوره معاهم في القسم
وبنت عمة خالة جوز ام الدكتور معيدة فى القسم
و العيله واخده القسم ايجار جديد
 واى تشابة قى الشخصيات  مقصود

لما تلاقي الراجل بتاع شئون الطلبه بيتكلم كأنه عميد الكليه

ويقولك دونت ورى درجات الرئفة هترفعك او يستلمك على السلم بعد امتحان البيبر زى ما بيحصل معايا بعد كل امتحان ويفتح معال حوار من اول الامتحان سهل ولا صعب ويطلعك انك حمار وانة سهل لحد حكاية الدكتور بتاع المادة واتخرج سنة كام ومقاس جزمتة اية

لما تلاقي كليات طب واسنان وصيدله وهندسه متعقدين



لما تلاقوني في كليهصيدلةوبنجح رغم اني لا أفقه شيئا عن الصيدلة

يبقي انا اكيد في جامعه مصريه

خلص الكلام:D