احدي مقالات كتاب "فانلة داخلية تتسع لعدة أشخاص"

تعتبر الستاتس من اهم مميزات الفيس بوك .. ولأن الواحد بقاله حوالي 4 سنين عالفيس فبيقرا ستاتسات كتير جدا من ناس كتير جدا .. وبحكم خبرتي الضئيله قدرت ااقسم الستاتس اللي بيكتبها البعض إلى عدة أنواع :

----------------------------------------------------
-
ستاتس من نوع : هسيبكو على ناركو ..
------------------------------------------------------

ودي ستاتس تحس ان صاحبها عايز ياكل قلم على قفاه عشان يتعدل .. فعلاً .. الستاتس دي ميزتها انها لغز .. متفهمش صاحبها عايز يقول ايه ولا قصده ايه .. يعني مثلا .. كام واحد فينا لقى ستاتس لواحد من الفريندز كاتب:

"بجد حاجه تنرفز.. بس انا اخدت قراري" ..

طب ايه اللي نرفزك وايه القرار؟؟ .. متعرفش .. وتلاقي على الستاتس اللي زي دي سبعين كومنت من الفريندز .. تلاتين كومنت منهم علامات استفهام.. وتلاتين علامات تعجب.. والباقي بيحاول بقدر الامكان يستفز الواد يمكن يقول حاجه.. وممكن تلاقي في الوسط كومنت من فريند لطيف شكله عارف الموضوع بيقول :" مش مشكله .. شوف غيرها يا فوزي ولما تلاقيها كلمني وانا هزبط الباقي" ..طب يشوف ايه ويزبط ايه ؟؟؟.. متفهمونا ياجدعان!! .. ولكن في الاخر تلاقي صاحب الستاتس كاتب بعد 100 كومنت اتبعتوله "برضه مقدرش ااقول حاجه غير حسبي الله ونعم الوكيل " .. وتتكرر حدوته الكومنتات تاني .. انت بتقول حسبي الله على ايه ؟؟.. فيه ايه؟؟ .. و في الاخر خاااالص بتلاقي ان صاحبنا كاتب " يا جماعه متخدوش في بالكو .. ده موضوع شخصي" .. طب طالما هو شخصي فالقنا ليه ع الفيس بوك .. حاجه تنرفز..

تحليل شخصية صاحب هذا النوع من الاستاتس :
حمار


----------------------------------------------------
--
ستاتس من نوع (انا في الحمام دلوقتي) ..
------------------------------------------------------

زي ما فيه ناس كانت بتعتقد ان الارض مركز الكون .. فيه برضه صنف من الفريندز بيعتقد ان هو نفسه مركز الفيس بوك ومنه بيتفرع كل الفريندظ حول العالم .. ستاتس (انا في الحمام دلوقتي) صاحبها بيتوهم وبيتخيل ان الناس بتصحى الصبح .. بتغسل وشها .. تضرب النسكافيه ..ثم تبدأ رحلتها في الدخول على بروفايله الشخصي .. هو بيتهيأله كده ..وبيتخيل ان الناس دي بتشوفه يا ترى عامل ايه؟؟ واحواله ايه؟؟ وكاتب ايه؟؟ .. واكل ايه ؟؟ وشرب ايه؟؟ وعمل ادد لمين؟؟ .. وعمل كومنت على مين؟؟؟ .. ولذلك بتلاقي صاحبنا ده بيتحف الناس بكل ما هو جديد في حياته .. هتلاقي دايما الستاتس بتاعته بتتجدد سبعتاشر مرة في اليوم وهتلاقيها زي :

- "النهاردة كان يوم جميل .. انا اتبسطت قوي مع أصحابي .. احب اشكر سُها وتُها وبُها عالوقت اللطيف ده "

- " بجد زهقان اخر حاجه"

- "ابويا طلق امي وقتل حمايا"

- "ادعولي عشان امتحاناتي قربت"

- "انا شلت مادة .. حسبي الله ونعم الوكيل"

- "تواليت الحمام لسه متصلحش .. بس اكيد فيه حل للزنقة دي"

ازاي تميز صاحب هذا النوع من الاستاتس :

صاحب الاستاتس دي هتلاقيه :

1- لاجيء ع الفيس بوك .. صبح وليل وظهر وعصر ومبيقومش خالص ..كل ما تخش تلاقيه عالشات .. وفي الوقت اللي انت مش قادر فيه تلاحق على تلاته او اربعه في الشات هتلاقيه هو بيكلم سبعين واحد اون لاين في نفس اللحظة وبنفس الكفاءة ..

2- عنده 200 البوم مليانين صور .. صور في كل حته وبيغطوا انشطته اليوميه .. البوم صور مع العائله والبوم مع الفريندظ .. والبوم مع الفريندظ الغاليين قوي .. والبوم الرحلات والبوم الرحلات الكوول.. والبوم الخروجات الميه ميه ..والبوم احلى صحاب .. والبوم رحلة شرم الشيخ .. والبوم رحلة العين السخنه.. ده غير اربعتلاف صورة بروفايل بكتشر كلها شبه بعضها وبنفس الوضعيه بيبدلها سبع مرات في البروفايل كل يوم .. وهتلاقي صور البروفايل بتاعته غالبا هي شرح للستاتس .. ..يعني هتلاقي صورة في الجامعه .. صورة تانيه وهو بياكل في الجامعه .. .. صورة وهو جوه البيت ..صورة وهو نايم في البيت .. صورة وهو بيتليف في البانيو .. صورة وهو لافف الباشكير ..صورة وهو قاعد ع التواليت .. وهكذا ..

3- هتلاقيه مشترك في كل الجروبات اللي طلعت تحت اسم : "اعرف مين بيشوف بروفايلك؟".


4- هتلاقي دايما عنده البوم اسمه :

just me

----------------------------------------------------
--
ستاتس (الكآآآبه) ..
------------------------------------------------------

كل واحد فينا هيلاقي تلاته او اربعه من الفريندز عنده قمه في الاكتئاب الأزلي .. مبيكتبوش حاجه غير القرف والنكد والاحباط ..وتلاقي دايما الستاتس بتاعتهم زي :

" زهقت من كل حاجه .. الحياة بقت مقرفه "

" انا محبط .. زعلان .. مضايق"

" مفيش حاجه نافعه .. هولع في روحي "

صاحب هذا النوع من الاستاتس بيتعامل مع الفيس بوك على انه قعدة كابينيه .. يخش يرجّع النكد اللي جواه ويطلع يمارس حياته الطبيعيه .. ومش فاهم ليه ..

******ازاي تميز صاحب هذا النوع من الاستاتس ****

- علطول هتلاقيه حاطط صورة بروفايل دمويه و كئيبة موت ..زي صورة اتنين وقت الغروب بيحضنوا بعض الحضن الاخير والدم مطرطش من جنابهم ومغرق الدنيا وهمه مكملين حضن عادي (ازاي؟ مش قادر اعرف) ..ممكن تلاقيه حاطط صورة شاب امور معندوش اي مشاكل في الحياه غير ان فيه خنجر راشق في صدره وفيه دم نازل ع الارض على شكل قلب كبير (برضه مش فاهم ازاي) ...ممكن تلاقيه حاطط صورة واحد وواحده لابسين اشيك حاجه في الدنيا وحاضنين بعض و جنبهم عصير فرجلو واكل ديلفري ومستنين قطر من بعييييد جي يموتهم سوا ....


----------------------------------------------------
------------------------
ستاتس (اذا احببت شيئاً بشدة فاتركه .. فان عاد اليك فهو بالتأكيد سيكون بنطلونك ) ..
------------------------------------------------------------------------------

(اذا احببت شيئاً بشدة فاتركه .. فان عاد اليك فهو ملكك للابد)..

فيه اشاعه بتقول انك لو مكتبتش الستاتس دي مرة او مرتين في حياتك ع الفيس بوك ممكن تفقد الاكونت بتاعك للابد وعمره ما هيرجعلك تاني ....

بس فعلاً مش عارف ايه سر حب الناس الشديد ليها؟؟؟؟ .. كتير قوي بيكتبوها!!!.. هتلاقي تسعين في الميه من الفريندز عندك جه عليهم وقت كانوا كاتبين الاستاتس دي .. و مش عارف ليه دي بالذات دوناً عن حكم وامثال الدنيا كلها؟ .. وايه اللي الناس عماله تفقده ومبيرجعش ولو رجع هتملكه للابد؟؟.. ايه سر حب الناس الغريب للستاتس دي؟؟ .. بتتكتب كتير.. وليها سبعتاشر جروب .. وسبعمية بايج .. ومية اكونت .. طب ليه ..

تحليل شخصية صاحب هذا النوع من الاستاتس :
والله فعلاً مش عارف ..

----------------------------------------------------
--------------
النوع الأخير .. ستاتس (هعقدك في عيشتك يا حيوان) ..
-------------------------------------------------------------------

هتلاقي عندك غالباً فريند محترف انه يكتب ستاتس بالانجليزي ومكلكعه التنين متفهمش منها حرف .. المشكله ان بيبقى فيها كلام مجعلص والمشكله الاكبر انك بتقدر تترجم كل كلمه لوحدها لكن لما تربط الكلام مع بعضه تلاقيه مش راكب .. بس اللي يطمنك ان فيه ناس قليله عاملين عليها لايك .. عارف لو كتير عاملين لايك يبقى انت لازم تراجع نفسك .. خد كورس كونفرسايشن في الجامعه الامريكية .. او خد تويفل عشان تمتحن وتفهم الاستاتس اللي زي دي .. فيه حل تاني .. اعمل لايك وانت ساكت ولا من شاف ولا من دري وعنك ما فهمت .. او اعمل لصاحبك بلوك عشان ميفكركش بخيبتك القوية وكله في سبيل انك تخلص من الالم النفسي اللي بتعانيه لما تلاقي هذا النوع المكلكع من الاستاتس ..

كيف تميز صاحب هذا النوع من الاستاتس ..
هتلاقيه غالباً مدارس لغات .. وانت يا حبة عيني .. تعليم مجاني ..

بس خلاص .. مفيش تاني ..